jaane kya aaseb tha patthar aate the

jaane kyā aaseb thā patthar aate the

raat ga.e kuchh saa.e chhat par aate the

sub.h vo kyārī phūloñ se bhar jaatī thī

tum jis kī beloñ meñ chhup kar aate the

maiñ jis raste par niklī us raste meñ

sahrāoñ ke beach samundar aate the

chāñd kī dhīmī dhīmī chaap ubharte hī

saare sapne phuul pahan kar aate the

is se merī ruuh meñ utrā hī na gayā

raste meñ do gahre sāgar aate the

ḳhvāboñ ke yāqūt se poreñ zaḳhmī haiñ

raas mujhe kab aise zevar aate the

jaane kya aaseb tha patthar aate the

raat gae kuchh sae chhat par aate the

subh wo kyari phulon se bhar jati thi

tum jis ki belon mein chhup kar aate the

main jis raste par nikli us raste mein

sahraon ke beach samundar aate the

chand ki dhimi dhimi chap ubharte hi

sare sapne phul pahan kar aate the

is se meri ruh mein utra hi na gaya

raste mein do gahre sagar aate the

KHwabon ke yaqut se poren zaKHmi hain

ras mujhe kab aise zewar aate the