jaane kya baat hai manus bahut lagta hai

jaane kyā baat hai mānūs bahut lagtā hai

ye jo ik ġhair sā is bazm meñ aa baiThā hai

umr-bhar tū ne zamāne kā kahā maanā hai

dil kī āvāz bhī sun dekh to kyā kahtā hai

mil bhī jaa.e jo koī naav to ab kyā hāsil

ab to dariyā mire darvāze pe aa pahuñchā hai

us ne dil jaan ke chheḌā use ma.alūm na thā

mere pahlū meñ dahaktā huā añgārā hai

merā jī jaane hai yā merā ḳhudā jaane hai

kyā sunā hai tire is shahr meñ kyā dekhā hai

haa.e kyā dīda-varī hai ki sahar-dam ye khulā

jis ko ham sham.a samajhte rahe parvāna hai

koī ro.e to hañso koī hañse to rovo

aaj ke daur meñ jiine kā yahī rasta hai

mere siine meñ ḳhunuk tīrgiyāñ chhoḌ gayā

ek ā.īna ki sūraj kī tarah jaltā hai

koī bastī na koī peḌ na chashma koī

qāfila umr-e-ravāñ kā ye kahāñ utrā hai

jāh-o-mansab kī havas ho to maiñ kāfir 'shohrat'

maiñ sag-e-kū-e-alī huuñ merā kyā kahnā hai

jaane kya baat hai manus bahut lagta hai

ye jo ek ghair sa is bazm mein aa baiTha hai

umr-bhar tu ne zamane ka kaha mana hai

dil ki aawaz bhi sun dekh to kya kahta hai

mil bhi jae jo koi naw to ab kya hasil

ab to dariya mere darwaze pe aa pahuncha hai

us ne dil jaan ke chheDa use malum na tha

mere pahlu mein dahakta hua angara hai

mera ji jaane hai ya mera KHuda jaane hai

kya suna hai tere is shahr mein kya dekha hai

hae kya dida-wari hai ki sahar-dam ye khula

jis ko hum shama samajhte rahe parwana hai

koi roe to hanso koi hanse to rowo

aaj ke daur mein jine ka yahi rasta hai

mere sine mein KHunuk tirgiyan chhoD gaya

ek aaina ki suraj ki tarah jalta hai

koi basti na koi peD na chashma koi

qafila umr-e-rawan ka ye kahan utra hai

jah-o-mansab ki hawas ho to main kafir 'shohrat'

main sag-e-ku-e-ali hun mera kya kahna hai