jaane kya hai jise dekho wahi dil-gir lage

jaane kyā hai jise dekho vahī dil-gīr lage

shahr kā shahr hī ab mo'taqid-e-mīr lage

sub.h āshufta-mizājoñ kī pareshāñ-e-suḳhanī

raat ik mār-e-siyah jaise ināñ-gīr lage

ab to jis aañkh ko dekho vahī pathrā.ī huī

ab to jis chehre ko āvāz do tasvīr lage

jaane kis shahr-e-tilismāt meñ aa niklā huuñ

apne qadmoñ kī sadā halqa-e-zanjīr lage

yahī maqdūr-e-masāfat hai ki ḳheme jal jaa.eñ

yahī maqsūm-e-safar hai ki koī tiir lage

zindagī bhar jinheñ jaañ kah ke pukārā gayā 'shauq'

vahī siine se mire sūrat-e-shamshīr lage

jaane kya hai jise dekho wahi dil-gir lage

shahr ka shahr hi ab mo'taqid-e-mir lage

subh aashufta-mizajon ki pareshan-e-suKHani

raat ek mar-e-siyah jaise inan-gir lage

ab to jis aankh ko dekho wahi pathrai hui

ab to jis chehre ko aawaz do taswir lage

jaane kis shahr-e-tilismat mein aa nikla hun

apne qadmon ki sada halqa-e-zanjir lage

yahi maqdur-e-masafat hai ki KHeme jal jaen

yahi maqsum-e-safar hai ki koi tir lage

zindagi bhar jinhen jaan kah ke pukara gaya 'shauq'

wahi sine se mere surat-e-shamshir lage