جانے کیوں اب یہ گماں ہونے لگا ہے مجھ کو

جانے کیوں اب یہ گماں ہونے لگا ہے مجھ کو

جیسے مدت سے کوئی ڈھونڈ رہا ہے مجھ کو

بول کس موڑ پہ ہوں کشمکش مرگ و حیات

ایسے عالم میں کہاں چھوڑ دیا ہے مجھ کو

خانہ زادان خرد کچھ تو کریں راہبری

یہ جنوں جانے کدھر لے کے گیا ہے مجھ کو

ایسا لگتا ہے کہ اب تو نہ بھرے گا تا عمر

زخم جو خواب شکستہ نے دیا ہے مجھ کو

میری تقدیر میں تحریر ہے تنہا سفری

خود سے شکوہ نہ کوئی تم سے گلہ ہے مجھ کو

آشیاں شاخ حوادث پہ بنایا تھا شمیمؔ

بعد اک عمر یہ معلوم ہوا ہے مجھ کو