jaane shab-e-firaq mein kya yaad aa gaya

jaane shab-e-firāq meñ kyā yaad aa gayā

dil yuuñ taḌap uThā ki ḳhudā yaad aa gayā

bād-e-sabā kī chheḌ se sharmā.e phuul jab

chehre kā us ke rang-e-hayā yaad aa gayā

aa.ī shab-e-firāq jo mahkī huī sabā

us vaqt qurb-e-zulf-e-dutā yaad aa gayā

ik bevafā se tark-e-ta.alluq na kar sake

har baar ham ko ahd-e-vafā yaad aa gayā

kyoñ ashk marne vāloñ kī āñkhoñ meñ aa ga.e

kyā lutf-e-zīst vaqt-e-qazā yaad aa gayā

chheḌā hai jab kisī ne kisī bevafā kā zikr

ham ko kisī kā ahd-e-vafā yaad aa gayā

dasht-e-junūñ meñ pairoñ se ḳhuuñ ristā dekh kar

hāthoñ kā us ke rang-e-hinā yaad aa gayā

jab bhī chaman meñ phuul khilā.e bahār ne

us kaj-adā kā husn-e-qabā yaad aa gayā

anjām-e-ishq ne jo satāyā kabhī 'zafar'

āġhāz-e-ishq kā bhī maza yaad aa gayā

jaane shab-e-firaq mein kya yaad aa gaya

dil yun taDap uTha ki KHuda yaad aa gaya

baad-e-saba ki chheD se sharmae phul jab

chehre ka us ke rang-e-haya yaad aa gaya

aai shab-e-firaq jo mahki hui saba

us waqt qurb-e-zulf-e-duta yaad aa gaya

ek bewafa se tark-e-talluq na kar sake

har bar hum ko ahd-e-wafa yaad aa gaya

kyon ashk marne walon ki aankhon mein aa gae

kya lutf-e-zist waqt-e-qaza yaad aa gaya

chheDa hai jab kisi ne kisi bewafa ka zikr

hum ko kisi ka ahd-e-wafa yaad aa gaya

dasht-e-junun mein pairon se KHun rista dekh kar

hathon ka us ke rang-e-hina yaad aa gaya

jab bhi chaman mein phul khilae bahaar ne

us kaj-ada ka husn-e-qaba yaad aa gaya

anjam-e-ishq ne jo sataya kabhi 'zafar'

aaghaz-e-ishq ka bhi maza yaad aa gaya