جانے عجلت میں کیا ہوا تھا مجھے

جانے عجلت میں کیا ہوا تھا مجھے

مشورہ دیر سے ملا تھا مجھے

سازشیں ہو رہی ہیں میرے خلاف

سچ میں ایسا ہی لگ رہا تھا مجھے

اب جو میں سوچتا ہوں بیٹھا ہوا

یہ تو پہلے ہی سوچنا تھا مجھے

عکس پر پھینکتا تھا قہقہہ میں

عکس رو رو کے دیکھتا تھا مجھے

بے حسی بھی کوئی علاج نہیں

اس کا احساس ہو چکا تھا مجھے

اس نے واپس ضرور کر دیا دل

ہاں مگر توڑ کر دیا تھا مجھے

میں اکیلا تھا اپنے لشکر میں

بھاگ جانے میں فائدہ تھا مجھے