jaane wala iztirab-e-dil nahin

jaane vaalā iztirāb-e-dil nahīñ

ye taḌap taskīn ke qābil nahīñ

jaan de denā to kuchh mushkil nahīñ

jaan kā ḳhvāhāñ magar ai dil nahīñ

tujh se ḳhush-chashm aur bhī dekhe magar

ye nigah ye putliyāñ ye til nahīñ

rahte haiñ be-ḳhud jo tere ishq meñ

vo bahut hoshyār haiñ ġhāfil nahīñ

jo na siske vo tirā kushta hai kab

jo na taḌpe vo tirā bismil nahīñ

hijr meñ dam kā nikalnā hai muhāl

aap aa nikleñ to kuchh mushkil nahīñ

aa.iye hasrat-bhare dil meñ kabhī

kyā ye mahfil aap kī mahfil nahīñ

ham to zāhid marte haiñ us ḳhuld par

jo bahishtoñ meñ tire shāmil nahīñ

vo to vo tasvīr bhī us kī 'jalāl'

kahtī hai tum baat ke qābil nahīñ

jaane wala iztirab-e-dil nahin

ye taDap taskin ke qabil nahin

jaan de dena to kuchh mushkil nahin

jaan ka KHwahan magar ai dil nahin

tujh se KHush-chashm aur bhi dekhe magar

ye nigah ye putliyan ye til nahin

rahte hain be-KHud jo tere ishq mein

wo bahut hoshyar hain ghafil nahin

jo na siske wo tera kushta hai kab

jo na taDpe wo tera bismil nahin

hijr mein dam ka nikalna hai muhaal

aap aa niklen to kuchh mushkil nahin

aaiye hasrat-bhare dil mein kabhi

kya ye mahfil aap ki mahfil nahin

hum to zahid marte hain us KHuld par

jo bahishton mein tere shamil nahin

wo to wo taswir bhi us ki 'jalal'

kahti hai tum baat ke qabil nahin