jaane wale phir na lauTe kuchh to is mein raaz hai

jaane vaale phir na lauTe kuchh to is meñ raaz hai

kyā tilism-e-ḳhāk meñ bhī jāñ-fazā andāz hai

ye to hai mā'lūm dil meñ aa.e haiñ tīr-e-nazar

ye nahīñ mā'lūm lekin kaun tīr-andāz hai

koī samjhe yā na samjhe ham samajhte haiñ ise

maut meñ sar-basta saarā zindagī kā raaz hai

ibtidā-e-'ishq meñ duniyā se ham kho.e ga.e

us kā kyā anjām hogā jis kā ye āġhāz hai

kitnī dilkash haiñ sadā.eñ shīsha-e-dil kī tire

aaj tak mānūs kānoñ ko vahī āvāz hai

har taraf jalva nazar aatā hai un ke husn kā

ye hamārā dil hai yā un kā harīm-e-nāz hai

kaun dil kī dāstāñ mujh ko sunātā hai 'zabīh'

zarra zarra dasht kā jo gosha-e-parvāz hai

jaane wale phir na lauTe kuchh to is mein raaz hai

kya tilism-e-KHak mein bhi jaan-faza andaz hai

ye to hai ma'lum dil mein aae hain tir-e-nazar

ye nahin ma'lum lekin kaun tir-andaz hai

koi samjhe ya na samjhe hum samajhte hain ise

maut mein sar-basta sara zindagi ka raaz hai

ibtida-e-'ishq mein duniya se hum khoe gae

us ka kya anjam hoga jis ka ye aaghaz hai

kitni dilkash hain sadaen shisha-e-dil ki tere

aaj tak manus kanon ko wahi aawaz hai

har taraf jalwa nazar aata hai un ke husn ka

ye hamara dil hai ya un ka harim-e-naz hai

kaun dil ki dastan mujh ko sunata hai 'zabih'

zarra zarra dasht ka jo gosha-e-parwaz hai