jaani hui galiyon mein basar kar nahin pae

jaanī huī galiyoñ meñ basar kar nahīñ paa.e

lekin kabhī pardes meñ ghar kar nahīñ paa.e

har miil ke patthar pe lagā.e the nishānāt

sunte haiñ ki takmīl-e-safar kar nahīñ paa.e

ik tum ho jo ḳhāmoshī se bechain kiye ho

ik ham haiñ jo bātoñ se asar kar nahīñ paa.e

shahr-e-ġham-e-hastī meñ havā tez bahut thī

kitne hī charāġh apnī sahar kar nahīñ paa.e

kuchh un kī nigāhoñ se hayā jhāñk rahī thī

kuchh ham ġhalat andāz nazar kar nahīñ paa.e

ai rasm-e-mohabbat tirī tāzīm kī ham ne

koshish to bahut kī thī magar kar nahīñ paa.e

jaani hui galiyon mein basar kar nahin pae

lekin kabhi pardes mein ghar kar nahin pae

har mil ke patthar pe lagae the nishanat

sunte hain ki takmil-e-safar kar nahin pae

ek tum ho jo KHamoshi se bechain kiye ho

ek hum hain jo baaton se asar kar nahin pae

shahr-e-gham-e-hasti mein hawa tez bahut thi

kitne hi charagh apni sahar kar nahin pae

kuchh un ki nigahon se haya jhank rahi thi

kuchh hum ghalat andaz nazar kar nahin pae

ai rasm-e-mohabbat teri tazim ki hum ne

koshish to bahut ki thi magar kar nahin pae