jaanta hai kaun ab iman ka matlab hai kya

jāntā hai kaun ab īmān kā matlab hai kyā

kyā hai giitā meñ likhā qur.ān kā matlab hai kyā

haq ko pahchāne rah-e-haq par ho insāñ gāmzan

ye nahīñ to aur phir bhagvān kā matlab hai kyā

māl-o-zar 'ilm-o-hunar sab haiñ usī kī baḳhshisheñ

baḳhshishoñ par is qadar abhimān kā matlab hai kyā

utne phailāo ki chādar se nikal jaa.eñ na paañv

daur-e-hāzir meñ adhik santān kā matlab hai kyā

'umr bhar maiñ ne ḳhatā.eñ kī haiñ lekin is se kyā

tū to hai rahmān aur rahmān kā matlab hai kyā

jism ke sukh ke liye sab chain dil kā kho diyā

is taraqqī se bhalā insān kā matlab hai kyā

dekh kar hālāt-e-duniyā sochtā rahtā huuñ maiñ

buġhz aur nafrat ke is tūfān kā matlab hai kyā

paḌhne vaale ko lage har she'r apnī zindagī

varna ai 'gulshan' tire dīvān kā matlab hai kyā

jaanta hai kaun ab iman ka matlab hai kya

kya hai gita mein likha quran ka matlab hai kya

haq ko pahchane rah-e-haq par ho insan gamzan

ye nahin to aur phir bhagwan ka matlab hai kya

mal-o-zar 'ilm-o-hunar sab hain usi ki baKHshishen

baKHshishon par is qadar abhiman ka matlab hai kya

utne phailao ki chadar se nikal jaen na panw

daur-e-hazir mein adhik santan ka matlab hai kya

'umr bhar main ne KHataen ki hain lekin is se kya

tu to hai rahman aur rahman ka matlab hai kya

jism ke sukh ke liye sab chain dil ka kho diya

is taraqqi se bhala insan ka matlab hai kya

dekh kar haalat-e-duniya sochta rahta hun main

bughz aur nafrat ke is tufan ka matlab hai kya

paDhne wale ko lage har she'r apni zindagi

warna ai 'gulshan' tere diwan ka matlab hai kya