جانتا ہے کون اب ایمان کا مطلب ہے کیا

جانتا ہے کون اب ایمان کا مطلب ہے کیا

کیا ہے گیتا میں لکھا قرآن کا مطلب ہے کیا

حق کو پہچانے رہ حق پر ہو انساں گامزن

یہ نہیں تو اور پھر بھگوان کا مطلب ہے کیا

مال و زر علم و ہنر سب ہیں اسی کی بخششیں

بخششوں پر اس قدر ابھیمان کا مطلب ہے کیا

اتنے پھیلاؤ کہ چادر سے نکل جائیں نہ پاؤں

دور حاضر میں ادھک سنتان کا مطلب ہے کیا

عمر بھر میں نے خطائیں کی ہیں لیکن اس سے کیا

تو تو ہے رحمان اور رحمان کا مطلب ہے کیا

جسم کے سکھ کے لیے سب چین دل کا کھو دیا

اس ترقی سے بھلا انسان کا مطلب ہے کیا

دیکھ کر حالات دنیا سوچتا رہتا ہوں میں

بغض اور نفرت کے اس طوفان کا مطلب ہے کیا

پڑھنے والے کو لگے ہر شعر اپنی زندگی

ورنہ اے گلشنؔ ترے دیوان کا مطلب ہے کیا