jaanta hun ki sukun qismat-e-insan mein nahin

jāntā huuñ ki sukūñ qismat-e-insāñ meñ nahīñ

maiñ tumheñ apnā banā luuñ mire imkāñ meñ nahīñ

fikr-e-gulchīñ ġham-e-sayyād aur andesha-e-barq

jo sukūñ mujh ko qafas meñ hai gulistāñ meñ nahīñ

maiñ vo barbād-e-azal huuñ ki nasheman to kyā

merī taqdīr ke tinke bhī gulistāñ meñ nahīñ

kyoñ khaTaktī hai zamāne ko kisī kī laġhzish

daaġh laale meñ nahīñ yā mah-e-tābāñ meñ nahīñ

jis kī ta.amīr meñ ehsās-e-shikast-e-gul ho

merī vahshat kā ilaaj aise gulistāñ meñ nahīñ

sajde kartā huuñ ba-andāz-e-junūñ ro rau kar

hasb-e-ma.amūl ibādat mire īmāñ meñ nahīñ

kaj-ravī maslahat-e-husn hai varna 'bismil'

un meñ jo baat hai vo baat har insāñ meñ nahīñ

jaanta hun ki sukun qismat-e-insan mein nahin

main tumhein apna bana lun mere imkan mein nahin

fikr-e-gulchin gham-e-sayyaad aur andesha-e-barq

jo sukun mujh ko qafas mein hai gulistan mein nahin

main wo barbaad-e-azal hun ki nasheman to kya

meri taqdir ke tinke bhi gulistan mein nahin

kyon khaTakti hai zamane ko kisi ki laghzish

dagh lale mein nahin ya mah-e-taban mein nahin

jis ki tamir mein ehsas-e-shikast-e-gul ho

meri wahshat ka ilaj aise gulistan mein nahin

sajde karta hun ba-andaz-e-junun ro rau kar

hasb-e-mamul ibaadat mere iman mein nahin

kaj-rawi maslahat-e-husn hai warna 'bismil'

un mein jo baat hai wo baat har insan mein nahin