jaanta hun main tere kitne parastaron ko

jāntā huuñ maiñ tire kitne parastāroñ ko

zindagī chhū na sake jo tire ruḳhsāroñ ko

jin fasīloñ pe bahut dil ko bharosā thā unheñ

girte dekhā to pukārā thā bahut yāroñ ko

raushnī barq kiran phuul ġhazal chingārī

itnā āsān nahīñ bhūlnā dil-dāroñ ko

ham ko ḳhush-fahmī-e-ehsās ne zinda rakkhā

'umr-bhar phuul samajhte rahe angāroñ ko

ab vo patthar hai bulandī se zamīñ par gir kar

chashm-e-hairat se takā kartā hai kohsāroñ ko

koī tūfān na rakh deñ ye fasīl-o-dar meñ

dekhte rahnā zarā mulk ke me’māroñ ko

ham musāfir haiñ tire ghar meñ magar ai duniyā

jāvedāñ kar diyā ham ne tire nazzāroñ ko

vo chale jaa.eñ jo patthar kā jigar rakhte haiñ

hāl-e-dil ham na sunā pā.eñge dīvāroñ ko

sādgī dekh ke terī mujhe Dar lagtā hai

chhū na le tū kahīñ jalte hue angāroñ ko

shaam aatī hai to ḳhāmosh samundar ke qarīb

ḳhushbueñ DhūñDhtī phirtī haiñ ḳharīdāroñ ko

ḳhūb-sūrat hai na.ī qadroñ kā naqsha lekin

ghar na gir jaa.e sañbhāle raho dīvāroñ ko

'arsh tak pahle bas itnī hī rasā.ī thī 'bashīr'

chhū liyā karte the ham chāñd ke ruḳhsāroñ ko

jaanta hun main tere kitne parastaron ko

zindagi chhu na sake jo tere ruKHsaron ko

jin fasilon pe bahut dil ko bharosa tha unhen

girte dekha to pukara tha bahut yaron ko

raushni barq kiran phul ghazal chingari

itna aasan nahin bhulna dil-daron ko

hum ko KHush-fahmi-e-ehsas ne zinda rakkha

'umr-bhar phul samajhte rahe angaron ko

ab wo patthar hai bulandi se zamin par gir kar

chashm-e-hairat se taka karta hai kohsaron ko

koi tufan na rakh den ye fasil-o-dar mein

dekhte rahna zara mulk ke me’maron ko

hum musafir hain tere ghar mein magar ai duniya

jawedan kar diya hum ne tere nazzaron ko

wo chale jaen jo patthar ka jigar rakhte hain

haal-e-dil hum na suna paenge diwaron ko

sadgi dekh ke teri mujhe Dar lagta hai

chhu na le tu kahin jalte hue angaron ko

sham aati hai to KHamosh samundar ke qarib

KHushbuen DhunDhti phirti hain KHaridaron ko

KHub-surat hai nai qadron ka naqsha lekin

ghar na gir jae sanbhaale raho diwaron ko

'arsh tak pahle bas itni hi rasai thi 'bashir'

chhu liya karte the hum chand ke ruKHsaron ko