jata hai kahin KHun se nisbat ka asar bhi

jaatā hai kahīñ ḳhuun se nisbat kā asar bhī

talvār jo bolegī to le jā.egī sar bhī

pahle thā bahut fāsla bāzār se ghar kā

ab ek hī kamre meñ hai bāzār bhī ghar bhī

dekheñ to nazar aatī hai sad-rang ye duniyā

barteñ to huī jaatī hai be-rang nazar bhī

is shahr meñ ashkoñ kā likhā kaun paḌhegā

jab ḳhuun uchhaltā hai to bantī hai ḳhabar bhī

ye soch ke ham ne kabhī jugnū nahīñ pakḌe

niklegā añdhere se abhī nūr-e-sahar bhī

kyoñ haq kī sadā aatī nahīñ bāñg-e-darā se

ai ḳhvāhish-e-sad-rang zarā dekh idhar bhī

har shaḳhs liye gard-e-safar ghuum rahā hai

ik khel sā lagtā hai 'ziyā' ab to safar bhī

jata hai kahin KHun se nisbat ka asar bhi

talwar jo bolegi to le jaegi sar bhi

pahle tha bahut fasla bazar se ghar ka

ab ek hi kamre mein hai bazar bhi ghar bhi

dekhen to nazar aati hai sad-rang ye duniya

barten to hui jati hai be-rang nazar bhi

is shahr mein ashkon ka likha kaun paDhega

jab KHun uchhalta hai to banti hai KHabar bhi

ye soch ke hum ne kabhi jugnu nahin pakDe

niklega andhere se abhi nur-e-sahar bhi

kyon haq ki sada aati nahin bang-e-dara se

ai KHwahish-e-sad-rang zara dekh idhar bhi

har shaKHs liye gard-e-safar ghum raha hai

ek khel sa lagta hai 'ziya' ab to safar bhi