جاتا ہے کہیں خون سے نسبت کا اثر بھی

جاتا ہے کہیں خون سے نسبت کا اثر بھی

تلوار جو بولے گی تو لے جائے گی سر بھی

پہلے تھا بہت فاصلہ بازار سے گھر کا

اب ایک ہی کمرے میں ہے بازار بھی گھر بھی

دیکھیں تو نظر آتی ہے صد رنگ یہ دنیا

برتیں تو ہوئی جاتی ہے بے رنگ نظر بھی

اس شہر میں اشکوں کا لکھا کون پڑھے گا

جب خون اچھلتا ہے تو بنتی ہے خبر بھی

یہ سوچ کے ہم نے کبھی جگنو نہیں پکڑے

نکلے گا اندھیرے سے ابھی نور سحر بھی

کیوں حق کی صدا آتی نہیں بانگ درا سے

اے خواہش صد رنگ ذرا دیکھ ادھر بھی

ہر شخص لیے گرد سفر گھوم رہا ہے

اک کھیل سا لگتا ہے ضیاؔ اب تو سفر بھی