jata hai yar sair ko gulzar ki taraf

jaatā hai yaar sair ko gulzār kī taraf

merī nigāh hai gul-e-ruḳhsār kī taraf

hotī hai mere sāmne tasvīr yaar kī

jab dekhtā huuñ maiñ dar-o-dīvār kī taraf

yā-rab ho ḳhair aaj ki kuchh dekhtā hai vo

merī taraf kabhī kabhī talvār kī taraf

kartā hai qatl āshiq-e-miskīñ ko bazm meñ

duzdīda dekhnā tirā aġhyār kī taraf

hasrat hai ye mareñ bhī jo qaid-e-qafas meñ ham

sayyād pheñk de hameñ gulzār kī taraf

chāk-e-qafas se dekh tū ai andalīb-e-zār

kuchh lag rahī hai aag sī gulzār kī taraf

jata hai yar sair ko gulzar ki taraf

meri nigah hai gul-e-ruKHsar ki taraf

hoti hai mere samne taswir yar ki

jab dekhta hun main dar-o-diwar ki taraf

ya-rab ho KHair aaj ki kuchh dekhta hai wo

meri taraf kabhi kabhi talwar ki taraf

karta hai qatl aashiq-e-miskin ko bazm mein

duzdida dekhna tera aghyar ki taraf

hasrat hai ye maren bhi jo qaid-e-qafas mein hum

sayyaad phenk de hamein gulzar ki taraf

chaak-e-qafas se dekh tu ai andalib-e-zar

kuchh lag rahi hai aag si gulzar ki taraf