jate jate rah mein usne munh se uThaya junhi parda

jaate jaate raah meñ us ne muñh se uThāyā jūñhī pardā

raah ke jaane vāloñ ne bhī muñh us kā phir phir ke dekhā

qais mile to us se pūchhūñ kyā tire jī meñ aa.ī divāne

shahr ko tū ne kis liye chhoḌā kyuuñ ke ḳhush aayā tujh ko sahrā

sub.h se le kar shaam talak yaañ ye vo galī hai jis meñ phireñ haiñ

chāk-girebāñ mu-e-pareshāñ ham se hazāroñ āshiq-e-rusvā

us ne mazā kyā paayā hogā do chullū mai piine kā yaañ

jis mai-kash ke haath na aayā ġhabġhab-e-sāġhar sā.ad-e-mīnā

soḳhtagī ne ġham kī asar jo dil meñ kiyā hai hone lagā hai

thoḌā thoḌā rañg dhueñ ke sabza hamārī ḳhaak se paidā

ik Thokar meñ murde hazāroñ uTh baiTheñ haiñ gor se vohīñ

letā hai vo vaqt-e-ḳharāmash paañv se apne kār-e-masīhā

jaate haiñ nā kisī ke ghar ham aur na koī kuchh detā hai ham ko

qat.a kiye haiñ ham ne donoñ pā-e-talab aur dast-e-tamannā

aañkh laḌānā sāmne aanā muñh dikhlānā aur chhup jaanā

ye bhī adā hai koī zālim maan ḳhudā ko mat de iizā

'mus.hafī' is dilchasp zamīñ meñ tab.a kare gar terī rasā.ī

ḳhāma tirā kuchh kund nahīñ hai ek ġhazal tū aur bhī likh jā

jate jate rah mein us ne munh se uThaya junhi parda

rah ke jaane walon ne bhi munh us ka phir phir ke dekha

qais mile to us se puchhun kya tere ji mein aai diwane

shahr ko tu ne kis liye chhoDa kyun ke KHush aaya tujh ko sahra

subh se le kar sham talak yan ye wo gali hai jis mein phiren hain

chaak-gireban mu-e-pareshan hum se hazaron aashiq-e-ruswa

us ne maza kya paya hoga do chullu mai pine ka yan

jis mai-kash ke hath na aaya ghabghab-e-saghar saad-e-mina

soKHtagi ne gham ki asar jo dil mein kiya hai hone laga hai

thoDa thoDa rang dhuen ke sabza hamari KHak se paida

ek Thokar mein murde hazaron uTh baiThen hain gor se wohin

leta hai wo waqt-e-KHaramash panw se apne kar-e-masiha

jate hain na kisi ke ghar hum aur na koi kuchh deta hai hum ko

qata kiye hain hum ne donon pa-e-talab aur dast-e-tamanna

aankh laDana samne aana munh dikhlana aur chhup jaana

ye bhi ada hai koi zalim man KHuda ko mat de iza

'mushafi' is dilchasp zamin mein taba kare gar teri rasai

KHama tera kuchh kund nahin hai ek ghazal tu aur bhi likh ja