jate jate wo ye saza dega

jaate jaate vo ye sazā degā

mujh ko jiine kī vo duā degā

maiñ khilaunā huuñ us ke hāthoñ meñ

jī bahal jā.egā bhulā degā

vaqt kī muTThiyoñ meñ kuchh bhī nahīñ

vaqt degā to ham ko kyā degā

vo to āñdhī kā ek jhoñkā hai

aa.egā aur diye bujhā degā

kal sunegā jo merā naam kahīñ

pher kar muñh vo muskurā degā

pāniyoñ par likhī kahānī huuñ

koī tūfāñ mujhe miTā degā

ḳhud hī likkhegā merā ret pe naam

ḳhud hī qadmoñ se phir miTā degā

mujh ko anjān ban ke dekhegā

aur mujhe ajnabī banā degā

sūkhe patte kī tarah tum ko 'hasan'

vaqt ḳhud shāḳh se girā degā

jate jate wo ye saza dega

mujh ko jine ki wo dua dega

main khilauna hun us ke hathon mein

ji bahal jaega bhula dega

waqt ki muTThiyon mein kuchh bhi nahin

waqt dega to hum ko kya dega

wo to aandhi ka ek jhonka hai

aaega aur diye bujha dega

kal sunega jo mera nam kahin

pher kar munh wo muskura dega

paniyon par likhi kahani hun

koi tufan mujhe miTa dega

KHud hi likkhega mera ret pe nam

KHud hi qadmon se phir miTa dega

mujh ko anjaan ban ke dekhega

aur mujhe ajnabi bana dega

sukhe patte ki tarah tum ko 'hasan'

waqt KHud shaKH se gira dega