jab aablon se karb ke dhaare nikal paDe

jab ābloñ se karb ke dhāre nikal paḌe

izn-e-safar ke phir se ishāre nikal paḌe

jab garm pāniyoñ se mirī guftugū huī

to barf ke badan se sharāre nikal paḌe

us vaqt apne aap kī mujh ko milī ḳhabar

jab shahr-e-gum-shuda meñ shumāre nikal paḌe

ummīd-e-bahr-e-nau meñ kabhī ġhota-zan thā maiñ

kyoñ gahre pāniyoñ se ḳhasāre nikal paḌe

ḳhauf-e-shab-e-muhīb miTāne ke vāste

sūraj ke saath chāñd sitāre nikal paḌe

raste ke pattharoñ ne hameñ jab bhī dī sadā

ham ne thakan ke bojh utāre nikal paḌe

ham ko na pā ke hādse apne maqām par

'tābish' hamārī khoj meñ saare nikal paḌe

jab aablon se karb ke dhaare nikal paDe

izn-e-safar ke phir se ishaare nikal paDe

jab garm paniyon se meri guftugu hui

to barf ke badan se sharare nikal paDe

us waqt apne aap ki mujh ko mili KHabar

jab shahr-e-gum-shuda mein shumare nikal paDe

ummid-e-bahr-e-nau mein kabhi ghota-zan tha main

kyon gahre paniyon se KHasare nikal paDe

KHauf-e-shab-e-muhib miTane ke waste

suraj ke sath chand sitare nikal paDe

raste ke pattharon ne hamein jab bhi di sada

hum ne thakan ke bojh utare nikal paDe

hum ko na pa ke hadse apne maqam par

'tabish' hamari khoj mein sare nikal paDe