jab aaftab ghar pe bulaya tha sham ne

jab āftāb ghar pe bulāyā thā shaam ne

kyā kyā diye the jin ko jalāyā thā shaam ne

kyā kyā ḳhushī thī va.ada-e-māh-e-tamām kī

ghar ko bhisht-zār banāyā thā shaam ne

kyā kyā the ḳhvāb raat jo ta.abīr ho ga.e

kyā kyā diloñ meñ hashr uThāyā thā shaam ne

kyā kyā uḌī thī gardish-e-daurāñ ke dil meñ ḳhaak

jab ratjage se haath milāyā thā shaam ne

kyā kyā gumāñ mahakne lage the pas-e-ḳhayāl

jab muskurā ke jaam uThāyā thā shaam ne

kyā kyā sahar ne phuul khilā.e pas--e-shafaq

kyā kyā dayār-e-shab ko sajāyā thā shaam ne

jab aaftab ghar pe bulaya tha sham ne

kya kya diye the jin ko jalaya tha sham ne

kya kya KHushi thi wada-e-mah-e-tamam ki

ghar ko bhisht-zar banaya tha sham ne

kya kya the KHwab raat jo tabir ho gae

kya kya dilon mein hashr uThaya tha sham ne

kya kya uDi thi gardish-e-dauran ke dil mein KHak

jab ratjage se hath milaya tha sham ne

kya kya guman mahakne lage the pas-e-KHayal

jab muskura ke jam uThaya tha sham ne

kya kya sahar ne phul khilae pas--e-shafaq

kya kya dayar-e-shab ko sajaya tha sham ne