jab aaftab se chehra chhupa rahi thi hawa

jab āftāb se chehrā chhupā rahī thī havā

nazar bachā ke tire shahr jā rahī thī havā

maiñ us ko rotā huā dekhtā rahā chup-chāp

chamelī ghaas pe Tap Tap girā rahī thī havā

vo maañ hai āb-e-ravāñ kī tabhī samundar ko

uThā ke god meñ jhūlā jhulā rahī thī havā

vo ḳhvāb thā yā safar aane vaale mausam kā

marī paḌī thī zamīñ zahr khā rahī thī havā

na-jāne dosh pe kis ko uThā ke raat ga.e

tabīb-e-shahr kā dar khaTkhaTā rahī thī havā

maiñ garm-o-sard ko taqdīr samjhe baiThā rahā

nizām-e-mausam-e-hastī chalā rahī thī havā

tamām umar maiñ samjhā havā muḳhālif hai

mire charāġh meñ ḳhud ko jalā rahī thī havā

jab aaftab se chehra chhupa rahi thi hawa

nazar bacha ke tere shahr ja rahi thi hawa

main us ko rota hua dekhta raha chup-chap

chameli ghas pe Tap Tap gira rahi thi hawa

wo man hai aab-e-rawan ki tabhi samundar ko

uTha ke god mein jhula jhula rahi thi hawa

wo KHwab tha ya safar aane wale mausam ka

mari paDi thi zamin zahr kha rahi thi hawa

na-jaane dosh pe kis ko uTha ke raat gae

tabib-e-shahr ka dar khaTkhaTa rahi thi hawa

main garm-o-sard ko taqdir samjhe baiTha raha

nizam-e-mausam-e-hasti chala rahi thi hawa

tamam umar main samjha hawa muKHalif hai

mere charagh mein KHud ko jala rahi thi hawa