جب آنا ہی ہے تو کیا فائدہ تھکا کے مجھے

جب آنا ہی ہے تو کیا فائدہ تھکا کے مجھے

فرشتو دفن کرو آسماں پہ جا کے مجھے

کہاں چلا ہے یوں آنکھوں سے تو پلا کے مجھے

پلٹ ادھر کو اے ساقی سنبھال آ کے مجھے

وہ اپنے ہاتھ پہ دشمن کا نام لکھتے ہیں

حنا بھی دیکھتی ہے تیوریاں چڑھا کے مجھے

یہ سچ ہے سر پہ جو آئی ہو وہ نہیں ٹلتی

اجل نے ڈھونڈ لیا ان کے دل میں جا کے مجھے

دکھاؤ گے مجھے محشر یہ تم نے خوب کہی

تو دیر کیا ہے دکھا دو نقاب اٹھا کے مجھے

ابھی ابھی وہ جنازے پہ میرے آئے ہیں

مرے رقیب کہاں لے چلے اٹھا کے مجھے

عدو سے حال مرا سن کے اشک بار نہ ہوں

ابھی تو آپ نے دیکھا نہیں ہے آ کے مجھے

مرے مزار کو بھی ٹھوکروں سے ٹھکرایا

مزے وہ لیتے ہیں حارثؔ مٹا مٹا کے مجھے