jab aana hi hai to kya faeda thaka ke mujhe

jab aanā hī hai to kyā fā.eda thakā ke mujhe

farishto dafn karo āsmāñ pe jā ke mujhe

kahāñ chalā hai yuuñ āñkhoñ se tū pilā ke mujhe

palaT idhar ko ai saaqī sañbhāl aa ke mujhe

vo apne haath pe dushman kā naam likhte haiñ

hinā bhī dekhtī hai tyoriyāñ chaḌhā ke mujhe

ye sach hai sar pe jo aa.ī ho vo nahīñ Taltī

ajal ne DhūñD liyā un ke dil meñ jā ke mujhe

dikhāoge mujhe mahshar ye tum ne ḳhuub kahī

to der kyā hai dikhā do naqāb uThā ke mujhe

abhī abhī vo janāze pe mere aa.e haiñ

mire raqīb kahāñ le chale uThā ke mujhe

'adū se haal mirā sun ke ashk-bār na hoñ

abhī to aap ne dekhā nahīñ hai aa ke mujhe

mire mazār ko bhī Thokaroñ se Thukrāyā

maze vo lete haiñ 'hāris' miTā miTā ke mujhe

jab aana hi hai to kya faeda thaka ke mujhe

farishto dafn karo aasman pe ja ke mujhe

kahan chala hai yun aankhon se tu pila ke mujhe

palaT idhar ko ai saqi sanbhaal aa ke mujhe

wo apne hath pe dushman ka nam likhte hain

hina bhi dekhti hai tyoriyan chaDha ke mujhe

ye sach hai sar pe jo aai ho wo nahin Talti

ajal ne DhunD liya un ke dil mein ja ke mujhe

dikhaoge mujhe mahshar ye tum ne KHub kahi

to der kya hai dikha do naqab uTha ke mujhe

abhi abhi wo janaze pe mere aae hain

mere raqib kahan le chale uTha ke mujhe

'adu se haal mera sun ke ashk-bar na hon

abhi to aap ne dekha nahin hai aa ke mujhe

mere mazar ko bhi Thokaron se Thukraya

maze wo lete hain 'haaris' miTa miTa ke mujhe