jab aankhon mein KHwab suhane rahte hain

jab āñkhoñ meñ ḳhvāb suhāne rahte haiñ

ik ik pal meñ ka.ī zamāne rahte haiñ

saarī ḳhushiyāñ us ke paroñ meñ rahtī haiñ

jab chiḌiyā kī choñch meñ daane rahte haiñ

ranj-o-ġham kī dhuup yahāñ aa.e kaise

is bastī meñ log purāne rahte haiñ

jab zinda-dil saḌkoñ par aa jaate haiñ

har vahshat ke hosh Thikāne rahte haiñ

saarī duniyā pyaar kī maarī hai lekin

nazroñ meñ kuchh ek divāne rahte haiñ

yādoñ ke dhuñdle dhuñdle se mausam meñ

kuchh chehre jaane pahchāne rahte haiñ

merī ġhazloñ merī nazmoñ meñ yaaro

lafzoñ ke bas tāne-bāne rahte haiñ

har manzar āñkhoñ se guzartā hai phir bhī

log siyāne haiñ anjāne rahte haiñ

sirf bharam ummīd kā rakhne kī ḳhātir

rishtoñ ke sab bojh uThāne rahte haiñ

be-ghar haiñ dukh dard 'zahīn' un ke aksar

ḳhushiyoñ ke ghar aane jaane rahte haiñ

jab aankhon mein KHwab suhane rahte hain

ek ek pal mein kai zamane rahte hain

sari KHushiyan us ke paron mein rahti hain

jab chiDiya ki chonch mein dane rahte hain

ranj-o-gham ki dhup yahan aae kaise

is basti mein log purane rahte hain

jab zinda-dil saDkon par aa jate hain

har wahshat ke hosh Thikane rahte hain

sari duniya pyar ki mari hai lekin

nazron mein kuchh ek diwane rahte hain

yaadon ke dhundle dhundle se mausam mein

kuchh chehre jaane pahchane rahte hain

meri ghazlon meri nazmon mein yaro

lafzon ke bas tane-bane rahte hain

har manzar aankhon se guzarta hai phir bhi

log siyane hain anjaane rahte hain

sirf bharam ummid ka rakhne ki KHatir

rishton ke sab bojh uThane rahte hain

be-ghar hain dukh dard 'zahin' un ke aksar

KHushiyon ke ghar aane jaane rahte hain