جب آس کا دیپک بجھتا ہے نظروں کا سلام آ جاتا ہے

جب آس کا دیپک بجھتا ہے نظروں کا سلام آ جاتا ہے

مرنے کی تمنا کرتے ہی جینے کا پیام آ جاتا ہے

جب ہوک سی دل میں اٹھتی ہے جب درد بدلتا ہے پہلو

بے ساختہ میرے ہونٹوں پر کیوں آپ کا نام آ جاتا ہے

کیا بھید ہے اس میں اے واعظ توبہ کا ارادہ کرتے ہی

کیوں کالی گھٹائیں آتی ہیں کیوں رقص میں جام آ جاتا ہے

جی بھر کے نظارہ کرنے کا موقع ہی نہیں ملتا مجھ کو

جب سامنا ان کا ہوتا ہے سجدے کا مقام آ جاتا ہے

اس واسطے اس کو سینے سے دن رات لگائے رکھتا ہوں

اچھا ہے برا ہے جیسا ہے دل وقت پہ کام آ جاتا ہے

اے سوز خموشی بہتر ہے اظہار جنون الفت سے

تیرا ہی نہیں اس قصے میں ان کا بھی تو نام آ جاتا ہے