jab aas ka dipak bujhta hai nazron ka salam aa jata hai

jab aas kā dīpak bujhtā hai nazroñ kā salām aa jaatā hai

marne kī tamanna karte hī jiine kā payām aa jaatā hai

jab huuk sī dil meñ uThtī hai jab dard badaltā hai pahlū

be-sāḳhta mere hoñToñ par kyoñ aap kā naam aa jaatā hai

kyā bhed hai is meñ ai vaa.iz tauba kā irāda karte hī

kyoñ kaalī ghaTā.eñ aatī haiñ kyoñ raqs meñ jaam aa jaatā hai

jī bhar ke nazāra karne kā mauqa hī nahīñ miltā mujh ko

jab sāmnā un kā hotā hai sajde kā maqām aa jaatā hai

is vāste us ko siine se din-rāt lagā.e rakhtā huuñ

achchhā hai burā hai jaisā hai dil vaqt pe kaam aa jaatā hai

ai soz ḳhamoshī behtar hai iz.hār-e-junūn-e-ulfat se

terā hī nahīñ is qisse meñ un kā bhī to naam aa jaatā hai

jab aas ka dipak bujhta hai nazron ka salam aa jata hai

marne ki tamanna karte hi jine ka payam aa jata hai

jab huk si dil mein uThti hai jab dard badalta hai pahlu

be-saKHta mere honTon par kyon aap ka nam aa jata hai

kya bhed hai is mein ai waiz tauba ka irada karte hi

kyon kali ghaTaen aati hain kyon raqs mein jam aa jata hai

ji bhar ke nazara karne ka mauqa hi nahin milta mujh ko

jab samna un ka hota hai sajde ka maqam aa jata hai

is waste us ko sine se din-raat lagae rakhta hun

achchha hai bura hai jaisa hai dil waqt pe kaam aa jata hai

ai soz KHamoshi behtar hai izhaar-e-junun-e-ulfat se

tera hi nahin is qisse mein un ka bhi to nam aa jata hai