jab aashiqi mein mera koi raaz-dan nahin

jab āshiqī meñ merā koī rāz-dāñ nahīñ

aisī lagī hai aag ki jis kā dhuāñ nahīñ

go maiñ sharīk-e-bazm sar-e-āsmāñ nahīñ

vo raaz kaun sā hai jo mujh par ayaañ nahīñ

maiñ sochtā huuñ ziist meñ nākām ho gayā

mere ḳhulūs-e-shauq kā jab imtihāñ nahīñ

merā maqām ishq-e-butāñ meñ hai be-misāl

go maiñ rahīn-e-minnat-e-pīr-e-muġhāñ nahīñ

vo āshiqī nahīñ hai koī kārobār hai

jis āshiqī meñ garmī-e-soz-e-nihāñ nahīñ

maiñ soz-o-sāz-e-shauq meñ had se guzar gayā

ab is safar meñ merā koī kārvāñ nahīñ

merī navā-e-ġham meñ hai shāmil fuġhān-e-gul

kaise kahūñ chaman meñ koī ham-zabāñ nahīñ

ma.amūr ho gayā hai vo soz-e-hayāt se

jo mubtalā-e-gardish-e-kaun-o-makāñ nahīñ

shauq-e-safar meñ valvala-e-dil nahīñ rahā

dushman rah-e-hayāt meñ jab āsmāñ nahīñ

jab aashiqi mein mera koi raaz-dan nahin

aisi lagi hai aag ki jis ka dhuan nahin

go main sharik-e-bazm sar-e-asman nahin

wo raaz kaun sa hai jo mujh par ayan nahin

main sochta hun zist mein nakaam ho gaya

mere KHulus-e-shauq ka jab imtihan nahin

mera maqam ishq-e-butan mein hai be-misal

go main rahin-e-minnat-e-pir-e-mughan nahin

wo aashiqi nahin hai koi karobar hai

jis aashiqi mein garmi-e-soz-e-nihan nahin

main soz-o-saz-e-shauq mein had se guzar gaya

ab is safar mein mera koi karwan nahin

meri nawa-e-gham mein hai shamil fughan-e-gul

kaise kahun chaman mein koi ham-zaban nahin

mamur ho gaya hai wo soz-e-hayat se

jo mubtala-e-gardish-e-kaun-o-makan nahin

shauq-e-safar mein walwala-e-dil nahin raha

dushman rah-e-hayat mein jab aasman nahin