jab apne dil pe apna kuchh iKHtiyar dekha

jab apne dil pe apnā kuchh iḳhtiyār dekhā

begāna-ḳhū hasīñ ko begāna-vār dekhā

paiham tajalliyoñ kī mujh meñ sakat kahāñ thī

nazreñ churā churā kar sūe-nigār dekhā

aaj apnī be-ḳhudī ko irfāñ kī raushnī meñ

us māh-e-sīm-tan kā ā.īna-dār dekhā

terī ināyatoñ se anjām-bīñ nazar meñ

āġhāz-e-ishq hī meñ anjām-e-kār dekhā

ye bholī bholī sūrat ai chāñd phir bhī tū ne

merī taraf se apne dil meñ ġhubār dekhā

husn-e-shabāb-parvar kis darje sehar-zā hai

dekhā tirā zamāna ai gul-e-ezār dekhā

us shoḳh kī galī meñ manzūr-e-tafta-jāñ ko

phir be-qarār paayā phir ashk-bār dekhā

jab apne dil pe apna kuchh iKHtiyar dekha

begana-KHu hasin ko begana-war dekha

paiham tajalliyon ki mujh mein sakat kahan thi

nazren chura chura kar sue-nigar dekha

aaj apni be-KHudi ko irfan ki raushni mein

us mah-e-sim-tan ka aaina-dar dekha

teri inayaton se anjam-bin nazar mein

aaghaz-e-ishq hi mein anjam-e-kar dekha

ye bholi bholi surat ai chand phir bhi tu ne

meri taraf se apne dil mein ghubar dekha

husn-e-shabab-parwar kis darje sehar-za hai

dekha tera zamana ai gul-e-ezar dekha

us shoKH ki gali mein manzur-e-tafta-jaan ko

phir be-qarar paya phir ashk-bar dekha