جب بال و پر نہیں تو ہوا پر نہ جائیے

جب بال و پر نہیں تو ہوا پر نہ جائیے

آندھی میں سیر ارض و سما پر نہ جائیے

کیا شاندار لوگ ہیں دامن دریدہ لوگ

دل دیکھیے حضور قبا پر نہ جائیے

کیجے نہ ریگزار میں پھولوں کا انتظار

مٹی ہے اصل چیز گھٹا پر نہ جائیے

کچھ اور کہہ رہا ہوں غزل کے حوالے سے

مطلب سمجھیے طرز ادا پر نہ جائیے

آخر تو فیصلہ سر مقتل اسی کا ہے

اس انتظام جرم و سزا پر نہ جائیے

دنیا میں اور بھی تو اشارہ سفر کے ہیں

ہر بار اپنے دل کی سدا پر نہ جائیے