jab baal-o-par nahin to hawa par na jaiye

jab bāl-o-par nahīñ to havā par na jā.iye

āñdhī meñ sair-e-arz-o-samā par na jā.iye

kyā shāndār log haiñ dāman-darīda log

dil dekhiye huzūr qabā par na jā.iye

kiije na regzār meñ phūloñ kā intizār

miTTī hai asl chiiz ghaTā par na jā.iye

kuchh aur kah rahā huuñ ġhazal ke havāle se

matlab samajhiye tarz-e-adā par na jā.iye

āḳhir to faisla sar-e-maqtal usī kā hai

is intizām-e-jurm-o-sazā par na jā.iye

duniyā meñ aur bhī to ishāre safar ke haiñ

har baar apne dil kī sadā par na jā.iye

jab baal-o-par nahin to hawa par na jaiye

aandhi mein sair-e-arz-o-sama par na jaiye

kya shandar log hain daman-darida log

dil dekhiye huzur qaba par na jaiye

kije na regzar mein phulon ka intizar

miTTi hai asl chiz ghaTa par na jaiye

kuchh aur kah raha hun ghazal ke hawale se

matlab samajhiye tarz-e-ada par na jaiye

aaKHir to faisla sar-e-maqtal usi ka hai

is intizam-e-jurm-o-saza par na jaiye

duniya mein aur bhi to ishaare safar ke hain

har bar apne dil ki sada par na jaiye