جب بہار آئی ہے زنجیر بہ پا رکھا ہے

جب بہار آئی ہے زنجیر بہ پا رکھا ہے

اقربا نے مجھے دیوانہ بنا رکھا ہے

ہم سخن غیر سے رہنا ہے قرینہ اخلاق

مجھ سے کم بولنے کا نام حیا رکھا ہے

روز ہوتی ہے ہزاروں ہی گھروں میں شب غم

شمع رویوں نے بھی اندھیر مچا رکھا ہے

مایۂ زیست ہے باقی دل یک قطرۂ خوں

سو وہ آنکھوں سے ٹپکنے کو بچا رکھا ہے

داغ حسرت کہ ہے ویرانۂ دل میں روشن

مردہ امیدوں کی تربت پہ دیا رکھا ہے

بزم میں داد نہ دینا ہے خلاف آداب

اے وفاؔ ورنہ ترے شعروں میں کیا رکھا ہے