jab bahaya hi nahin aankh se pani maine

jab bahāyā hī nahīñ aañkh se paanī maiñ ne

ek hī lafz meñ likh dī hai kahānī maiñ ne

zabt tūfān kā TuuTā na kabhī siine meñ

rok rakkhī hai samundar kī ravānī maiñ ne

shabd be-ḳhauf kitāboñ meñ utāre maiñ ne

phir kitāboñ pe jamī ḳhaak bhī chhānī maiñ ne

mujh ko vijdān thā sailāb ne to aanā hai

dekh lī ḳhvāb meñ is shaam nishānī maiñ ne

ārzūoñ ne mire dil meñ tabāhī kar dī

phir kisī chaah kī ummīd na Thānī maiñ ne

tū ne samjhā thā mujhe aaj bhī pāgal huuñ vahī

'ādateñ chhoḌ diiñ jitnī thī purānī maiñ ne

kyā batā.ūñ maiñ use 'umr-e-gurezāñ se 'umūd'

siikh lī dasht meñ ab ḳhaak uḌānī maiñ ne

jab bahaya hi nahin aankh se pani main ne

ek hi lafz mein likh di hai kahani main ne

zabt tufan ka TuTa na kabhi sine mein

rok rakkhi hai samundar ki rawani main ne

shabd be-KHauf kitabon mein utare main ne

phir kitabon pe jami KHak bhi chhani main ne

mujh ko wijdan tha sailab ne to aana hai

dekh li KHwab mein is sham nishani main ne

aarzuon ne mere dil mein tabahi kar di

phir kisi chah ki ummid na Thani main ne

tu ne samjha tha mujhe aaj bhi pagal hun wahi

'adaten chhoD din jitni thi purani main ne

kya bataun main use 'umr-e-gurezan se 'umud'

sikh li dasht mein ab KHak uDani main ne