jab bayan karoge tum hum bayan mein niklenge

jab bayāñ karoge tum ham bayāñ meñ nikleñge

ham hī dāstāñ ban kar dāstāñ meñ nikleñge

ishq ho mohabbat ho pyaar ho ki chāhat ho

ham to har samundar ke darmiyāñ meñ nikleñge

raat kā añdherā hī raat meñ nahīñ hotā

chāñd aur sitāre bhī āsmāñ meñ nikleñge

dekh to kabhī shab ko kārvāñ sitāroñ kā

nuur ke ka.ī mahmil kahkashāñ meñ nikleñge

boliyāñ zamāne kī muḳhtalif to hotī haiñ

lafz pyaar ke lekin har zabāñ meñ nikleñge

kaaT kar badan saarā qaash qaash meñ jhāñkeñ

aap ke hayūle hī qalb-o-jāñ meñ nikleñge

ḳhaak kā samundar bhī kyā ajab samundar hai

is jahāñ meñ Dūbeñge us jahāñ meñ nikleñge

qissa-e-suḳhan-goī jab 'adīm' aa.egā

ham bhī vāqi.a ban kar dāstāñ meñ nikleñge

sirf sabz patte hī peḌ par nahīñ hote

kuchh na kuchh parinde bhī āshiyāñ meñ nikleñge

jab bayan karoge tum hum bayan mein niklenge

hum hi dastan ban kar dastan mein niklenge

ishq ho mohabbat ho pyar ho ki chahat ho

hum to har samundar ke darmiyan mein niklenge

raat ka andhera hi raat mein nahin hota

chand aur sitare bhi aasman mein niklenge

dekh to kabhi shab ko karwan sitaron ka

nur ke kai mahmil kahkashan mein niklenge

boliyan zamane ki muKHtalif to hoti hain

lafz pyar ke lekin har zaban mein niklenge

kaT kar badan sara qash qash mein jhanken

aap ke hayule hi qalb-o-jaan mein niklenge

KHak ka samundar bhi kya ajab samundar hai

is jahan mein Dubenge us jahan mein niklenge

qissa-e-suKHan-goi jab 'adim' aaega

hum bhi waqia ban kar dastan mein niklenge

sirf sabz patte hi peD par nahin hote

kuchh na kuchh parinde bhi aashiyan mein niklenge