jab bhi aankhon mein tere wasl ka lamha chamka

jab bhī āñkhoñ meñ tire vasl kā lamha chamkā

chashm-e-be-āb kī dahlīz pe dariyā chamkā

fasl-e-gul aa.ī khule baaġh meñ ḳhushbū ke alam

dil ke sāhil pe tire naam kā taarā chamkā

'aks be-naqsh hue aa.ine dhundlāne lage

dard kā chāñd sar-e-bām-e-tamannā chamkā

rañg āzād hue gul kī girah khulte hī

ek lamhe meñ 'ajab baaġh kā chehrā chamkā

pairahan meñ bhī tirā husn na thā hashr se kam

jab khule band-e-qabā aur hī naqsha chamkā

dil kī dīvār pe uḌte rahe malbūs ke rañg

der tak un meñ tirī yaad kā saayā chamkā

ruuh kī aañkh chakā-chauñd huī jaatī hai

kis kī aahaT kā mire kaan meñ naġhma chamkā

lahreñ uTh uTh ke magar us kā badan chūmtī thiiñ

vo jo paanī meñ gayā ḳhuub hī dariyā chamkā

hijr panpā na tirā vasl hameñ raas aayā

kisī maidān meñ taarā na hamārā chamkā

jaise bārish se dhule sehn-e-gulistāñ 'amjad'

aañkh jab ḳhushk huī aur vo chehrā chamkā

jab bhi aankhon mein tere wasl ka lamha chamka

chashm-e-be-ab ki dahliz pe dariya chamka

fasl-e-gul aai khule bagh mein KHushbu ke alam

dil ke sahil pe tere nam ka tara chamka

'aks be-naqsh hue aaine dhundlane lage

dard ka chand sar-e-baam-e-tamanna chamka

rang aazad hue gul ki girah khulte hi

ek lamhe mein 'ajab bagh ka chehra chamka

pairahan mein bhi tera husn na tha hashr se kam

jab khule band-e-qaba aur hi naqsha chamka

dil ki diwar pe uDte rahe malbus ke rang

der tak un mein teri yaad ka saya chamka

ruh ki aankh chaka-chaund hui jati hai

kis ki aahaT ka mere kan mein naghma chamka

lahren uTh uTh ke magar us ka badan chumti thin

wo jo pani mein gaya KHub hi dariya chamka

hijr panpa na tera wasl hamein ras aaya

kisi maidan mein tara na hamara chamka

jaise barish se dhule sehn-e-gulistan 'amjad'

aankh jab KHushk hui aur wo chehra chamka