jab bhi aankhon mein ashk bhar aae

jab bhī āñkhoñ meñ ashk bhar aa.e

log kuchh Dūbte nazar aa.e

apnā mehvar badal chukī thī zamīñ

ham ḳhalā se jo lauT kar aa.e

chāñd jitne bhī gum hue shab ke

sab ke ilzām mere sar aa.e

chand lamhe jo lauT kar aa.e

raat ke āḳhirī pahar aa.e

ek golī ga.ī thī sū-e-falak

ik parinde ke bāl-o-par aa.e

kuchh charāġhoñ kī saañs TuuT ga.ī

kuchh ba-mushkil dam-e-sahar aa.e

mujh ko apnā patā-Thikāna mile

vo bhī ik baar mere ghar aa.e

jab bhi aankhon mein ashk bhar aae

log kuchh Dubte nazar aae

apna mehwar badal chuki thi zamin

hum KHala se jo lauT kar aae

chand jitne bhi gum hue shab ke

sab ke ilzam mere sar aae

chand lamhe jo lauT kar aae

raat ke aaKHiri pahar aae

ek goli gai thi su-e-falak

ek parinde ke baal-o-par aae

kuchh charaghon ki sans TuT gai

kuchh ba-mushkil dam-e-sahar aae

mujh ko apna pata-Thikana mile

wo bhi ek bar mere ghar aae