جب بھی دیکھے وبال کرتی ہے

جب بھی دیکھے وبال کرتی ہے

آنکھ اس کی کمال کرتی ہے

آئنہ غور جب نہیں کرتا

مفلسی تب سوال کرتی ہے

عاشقی کا مزاج رب جانے

جینا مرنا محال کرتی ہے

داستانیں وجود پاتیں ہیں

نوجوانی کمال کرتی ہے

روح کو نذر کرنا پڑتا ہے

موت جس دم سوال کرتی ہے

بس تصور میں آ کے تیری ہنسی

سر کو لے لے کو تال کرتی ہے

جب بھی آتی ہے ہجر کی ساعت

دل کے شیشے میں بال کرتی ہے

بس تری یاد دن کے ڈھلتے ہی

مجھ کو ہر شب نڈھال کرتی ہے

تیری الفت کا ہے طفیل وسیمؔ

مجھ کو جو بے مثال کرتی ہے