jab bhi guzre hue lamhat ko dohraate hain

jab bhī guzre hue lamhāt ko dohrāte haiñ

ham ḳhud apne hī ḳhayāloñ meñ ulajh jaate haiñ

bhiiḌ itnī hai ki nazreñ nahīñ jamne pātīñ

aur manzar haiñ ki tezī se badal jaate haiñ

kuchh dinoñ se jo ye chāhā hai ki manzil na mile

merī samt aate hue hādse katrāte haiñ

is rivāyat se bahut jī kā ziyāñ hotā hai

ab to ham pursish-e-ahvāl se ghabrāte haiñ

ḳhud se uktā.e hue bazm se katrā.e hue

ab mire saath ka.ī log nazar aate haiñ

jo bhī rakhte haiñ yahāñ quvvat-e-iz.hār-e-numū

biij vo saḳht chaTānoñ pe bhī jam jaate haiñ

kabhī tanhā nahīñ aate haiñ purāne lamhe

kitne hī phūloñ kī ham-rāh mahak laate haiñ

jab bhi guzre hue lamhat ko dohraate hain

hum KHud apne hi KHayalon mein ulajh jate hain

bhiD itni hai ki nazren nahin jamne patin

aur manzar hain ki tezi se badal jate hain

kuchh dinon se jo ye chaha hai ki manzil na mile

meri samt aate hue hadse katraate hain

is riwayat se bahut ji ka ziyan hota hai

ab to hum pursish-e-ahwal se ghabraate hain

KHud se uktae hue bazm se katrae hue

ab mere sath kai log nazar aate hain

jo bhi rakhte hain yahan quwwat-e-izhaar-e-numu

bij wo saKHt chaTanon pe bhi jam jate hain

kabhi tanha nahin aate hain purane lamhe

kitne hi phulon ki ham-rah mahak late hain