جب بھی ہمیں کچھ عشق کا حاصل نظر آیا

جب بھی ہمیں کچھ عشق کا حاصل نظر آیا

در پردہ کوئی اپنے مقابل نظر آیا

جیسے کہ بہار آ گئی اجڑے ہوئے گھر میں

جب دامن دل سے کوئی واصل نظر آیا

اک سانس لیا تھا ابھی آزاد فضا میں

پھر سلسلۂ طوق و سلاسل نظر آیا

گزرا جو تری راہ گزر سے کبھی اے دوست

ہر ذرہ سے لپٹا ہوا اک دل نظر آیا

چھیڑو نہ مجھے میں بھی اسی در کا گدا ہوں

ہر ایک تونگر جہاں سائل نظر آیا

دنیائے محبت میں نہ پوچھ ہم سے کہ ہم کو

جینا ہی نہیں مرنا بھی مشکل نظر آیا

کہلا کے غزل ہم سے جو پڑھتا رہا کل تک

کہتے ہیں تغزل میں وہ کامل نظر آیا