jab bhi hamein kuchh ishq ka hasil nazar aaya

jab bhī hameñ kuchh ishq kā hāsil nazar aaya

dar-parda koī apne muqābil nazar aaya

jaise ki bahār aa ga.ī ujḌe hue ghar meñ

jab dāman-e-dil se koī vāsil nazar aaya

ik saañs liyā thā abhī āzād fazā meñ

phir silsila-e-tauq-o-salāsil nazar aaya

guzrā jo tirī rāhguzar se kabhī ai dost

har zarra se lipTā huā ik dil nazar aaya

chheḌo na mujhe maiñ bhī usī dar kā gadā huuñ

har ek tavangar jahāñ saa.il nazar aaya

duniyā-e-mohabbat meñ na pūchh ham se ki ham ko

jiinā hī nahīñ marnā bhī mushkil nazar aaya

kahlā ke ġhazal ham se jo paḌhtā rahā kal tak

kahte haiñ taġhazzul meñ vo kāmil nazar aaya

jab bhi hamein kuchh ishq ka hasil nazar aaya

dar-parda koi apne muqabil nazar aaya

jaise ki bahaar aa gai ujDe hue ghar mein

jab daman-e-dil se koi wasil nazar aaya

ek sans liya tha abhi aazad faza mein

phir silsila-e-tauq-o-salasil nazar aaya

guzra jo teri rahguzar se kabhi ai dost

har zarra se lipTa hua ek dil nazar aaya

chheDo na mujhe main bhi usi dar ka gada hun

har ek tawangar jahan sail nazar aaya

duniya-e-mohabbat mein na puchh hum se ki hum ko

jina hi nahin marna bhi mushkil nazar aaya

kahla ke ghazal hum se jo paDhta raha kal tak

kahte hain taghazzul mein wo kaamil nazar aaya