جب بھی ہوئی ہے مجھ پہ مری زندگی گراں

جب بھی ہوئی ہے مجھ پہ مری زندگی گراں

کیا کیا ترے خیال نے دی ہیں تسلیاں

اس دشت غم کو کیسے کہیں زندگی جہاں

خوشیوں کے پھول ہیں نہ بہاروں کے کارواں

ہوتے جو آپ درد بھرے دل کے غم گسار

رشک نشاط ہوتی مرے غم کی داستاں

سب نقش آرزو یہاں معدوم ہو گئے

اے میری زندگی مجھے لے آئی تو کہاں

پوچھو نہ شام رنج سے صبح نشاط تک

ٹوٹے ہیں دل پہ کتنے ستم ہائے ناگہاں

جو تیرے زلف و رخ کے تصور میں کٹ گئی

اس عمر کو سمجھتے ہیں سب عمر رائیگاں

اک دشمن سکوں مرے خوابوں کو چھین کر

ویران کر گیا ہے تمنا کی بستیاں

کچھ اور مانگتی ہے غزل آج کل شکیلؔ

فرسودہ ہو چکی ہے رخ و لب کی داستاں