jab bhi hui hai mujh pe meri zindagi giran

jab bhī huī hai mujh pe mirī zindagī girāñ

kyā kyā tire ḳhayāl ne dī haiñ tasalliyāñ

is dasht-e-ġham ko kaise kaheñ zindagī jahāñ

ḳhushiyoñ ke phuul haiñ na bahāroñ ke kārvāñ

hote jo aap dard-bhare dil ke ġham-gusār

rashk-e-nashāt hotī mire ġham kī dāstāñ

sab naqsh-e-ārzū yahāñ mā’dūm ho ga.e

ai merī zindagī mujhe le aa.ī tū kahāñ

pūchho na shām-e-ranj se sub.h-e-nashāt tak

TuuTe haiñ dil pe kitne sitam-hā-e-nāgahāñ

jo tere zulf-o-ruḳh ke tasavvur meñ kaT ga.ī

us 'umr ko samajhte haiñ sab ‘umr-e-rā.egāñ

ik dushman-e-sukūñ mire ḳhvāboñ ko chhīn kar

vīrān kar gayā hai tamannā kī bastiyāñ

kuchh aur māñgtī hai ġhazal āj-kal 'shakīl'

farsūda ho chukī hai ruḳh-o-lab kī dāstāñ

jab bhi hui hai mujh pe meri zindagi giran

kya kya tere KHayal ne di hain tasalliyan

is dasht-e-gham ko kaise kahen zindagi jahan

KHushiyon ke phul hain na bahaaron ke karwan

hote jo aap dard-bhare dil ke gham-gusar

rashk-e-nashat hoti mere gham ki dastan

sab naqsh-e-arzu yahan ma’dum ho gae

ai meri zindagi mujhe le aai tu kahan

puchho na sham-e-ranj se subh-e-nashat tak

TuTe hain dil pe kitne sitam-ha-e-nagahan

jo tere zulf-o-ruKH ke tasawwur mein kaT gai

us 'umr ko samajhte hain sab ‘umr-e-raegan

ek dushman-e-sukun mere KHwabon ko chhin kar

viran kar gaya hai tamanna ki bastiyan

kuchh aur mangti hai ghazal aaj-kal 'shakil'

farsuda ho chuki hai ruKH-o-lab ki dastan