jab bhi mahfil mein ahl-e-nazar aa gae

jab bhī mahfil meñ ahl-e-nazar aa ga.e

ham bhī le kar ġhazal pur-asar aa ga.e

ye siyāsat kī duniyā kā dastūr hai

jo the kal tak udhar vo idhar aa ga.e

zindagī us ko har taur āsāñ lage

jis ko jiine ke thoḌe hunar aa ga.e

dar-haqīqat jinheñ ham ne dekhā nahīñ

vo ḳhayāloñ meñ shām-o-sahar aa ga.e

har balā raah kī ḳhud-ba-ḳhud Tal ga.ī

paḌh ke nād-e-'alī muḳhtasar aa ga.e

ye shahādat mire ghar kī mīrās hai

jab zarūrat paḌī le ke sar aa ga.e

ham-qadam ho ga.iiñ jab bhī gumrāhiyāñ

un ke naqsh-e-kaf-e-pā nazar aa ga.e

mar na paa.e koī mulk meñ bhuuk se

vo 'adālat se le kar ḳhabar aa ga.e

jin kī lazzat meñ zahr-e-tamannā bhī hai

shāḳh-e-ehsās par vo samar aa ga.e

jo na aa.e the pahle tasavvur meñ bhī

ai 'kashish' aaj vo mere ghar aa ga.e

jab bhi mahfil mein ahl-e-nazar aa gae

hum bhi le kar ghazal pur-asar aa gae

ye siyasat ki duniya ka dastur hai

jo the kal tak udhar wo idhar aa gae

zindagi us ko har taur aasan lage

jis ko jine ke thoDe hunar aa gae

dar-haqiqat jinhen hum ne dekha nahin

wo KHayalon mein sham-o-sahar aa gae

har bala rah ki KHud-ba-KHud Tal gai

paDh ke nad-e-'ali muKHtasar aa gae

ye shahadat mere ghar ki miras hai

jab zarurat paDi le ke sar aa gae

ham-qadam ho gain jab bhi gumrahiyan

un ke naqsh-e-kaf-e-pa nazar aa gae

mar na pae koi mulk mein bhuk se

wo 'adalat se le kar KHabar aa gae

jin ki lazzat mein zahr-e-tamanna bhi hai

shaKH-e-ehsas par wo samar aa gae

jo na aae the pahle tasawwur mein bhi

ai 'kashish' aaj wo mere ghar aa gae