جب بھی محفل میں اہل نظر آ گئے

جب بھی محفل میں اہل نظر آ گئے

ہم بھی لے کر غزل پر اثر آ گئے

یہ سیاست کی دنیا کا دستور ہے

جو تھے کل تک ادھر وہ ادھر آ گئے

زندگی اس کو ہر طور آساں لگے

جس کو جینے کے تھوڑے ہنر آ گئے

درحقیقت جنہیں ہم نے دیکھا نہیں

وہ خیالوں میں شام و سحر آ گئے

ہر بلا راہ کی خودبخود ٹل گئی

پڑھ کے ناد علی مختصر آ گئے

یہ شہادت مرے گھر کی میراث ہے

جب ضرورت پڑی لے کے سر آ گئے

ہم قدم ہو گئیں جب بھی گمراہیاں

ان کے نقش کف پا نظر آ گئے

مر نہ پائے کوئی ملک میں بھوک سے

وہ عدالت سے لے کر خبر آ گئے

جن کی لذت میں زہر تمنا بھی ہے

شاخ احساس پر وہ ثمر آ گئے

جو نہ آئے تھے پہلے تصور میں بھی

اے کششؔ آج وہ میرے گھر آ گئے