jab bhi paDha hai sham ka chehra waraq waraq

jab bhī paḌhā hai shaam kā chehra varaq varaq

paayā hai āftāb kā māthā araq araq

lahje meñ DhūñDhiye na halāvat ki umr bhar

lamhoñ kā zahr ham ne piyā hai ramaq ramaq

the qahqahe sarāb samundar jo pī ga.e

kahne ko dil ke ghaav the raushan tabaq tabaq

qātil kā mil sakā na bhare shahr meñ surāġh

har chand merā ḳhuun thā phailā shafaq shafaq

jo shaḳhs dhaḌkanoñ meñ rahā muddatoñ asiir

us kī talāsh le ga.ī ham ko ufaq ufaq

Takrā gayā thā bhiiḌ meñ ḳhushbū kā qāfila

malbūs sarsarāte badan the abaq abaq

'zāhid' na.ī ġhazal hai ki taqsīm kā hisāb

bāñdhe haiñ tum ne ḳhuub qavāfī adaq adaq

jab bhi paDha hai sham ka chehra waraq waraq

paya hai aaftab ka matha araq araq

lahje mein DhunDhiye na halawat ki umr bhar

lamhon ka zahr hum ne piya hai ramaq ramaq

the qahqahe sarab samundar jo pi gae

kahne ko dil ke ghaw the raushan tabaq tabaq

qatil ka mil saka na bhare shahr mein suragh

har chand mera KHun tha phaila shafaq shafaq

jo shaKHs dhaDkanon mein raha muddaton asir

us ki talash le gai hum ko ufaq ufaq

Takra gaya tha bhiD mein KHushbu ka qafila

malbus sarsaraate badan the abaq abaq

'zahid' nai ghazal hai ki taqsim ka hisab

bandhe hain tum ne KHub qawafi adaq adaq