jab bhi tumhaari yaad ki aahaT mujhe mili

jab bhī tumhārī yaad kī aahaT mujhe milī

tanhā.ī kāñptī huī mujh se judā huī

āvāz de ke kis ko bulā.ūñ meñ apne paas

zulmat kī chaar so mire dīvār uTh ga.ī

vo log itnī der meñ kis samt ko ga.e

sāhil pe aa chukā thā safīna abhī abhī

haiñ sho.ala-bār tāroñ kī āñkheñ na jaane kyuuñ

jhulsā rahī hai jism ko kyuuñ aaj chāñdnī

ham apne dil kā haal sunā.eñ kise yahāñ

lagtā hai saarā shahr hameñ shams' ajnabī

jab bhi tumhaari yaad ki aahaT mujhe mili

tanhai kanpti hui mujh se juda hui

aawaz de ke kis ko bulaun mein apne pas

zulmat ki chaar so mere diwar uTh gai

wo log itni der mein kis samt ko gae

sahil pe aa chuka tha safina abhi abhi

hain shoala-bar taron ki aankhen na jaane kyun

jhulsa rahi hai jism ko kyun aaj chandni

hum apne dil ka haal sunaen kise yahan

lagta hai sara shahr hamein shams' ajnabi