jab bhi yaad aai mujhe us se milan ki KHushbu

jab bhī yaad aa.ī mujhe us se milan kī ḳhushbū

mujh ko yaad aa.ī bahut us ke badan kī ḳhushbū

gul kī ḳhushbū ho ki raihān kī bhīnī ḳhushbū

un kī ḳhushbū se mo.attar hai chaman kī ḳhushbū

garche pardes rahā chaar dahā.ī se pare

phir bhī din-rāt satātī hai vatan kī ḳhushbū

haq ke shaidā.ī sar-e-dār bhī haq bol ga.e

duur se aa.ī unheñ dār-o-rasan kī ḳhushbū

zikr allāh kā jin lab se huā chaar pahar

un kī sāñsoñ meñ basī mushk-e-ḳhutan kī ḳhushbū

qad to ūñchā hai mire yaar kā us se bhī sivā

vo sarāpā hai mirā sarv-o-saman kī ḳhushbū

hai ye miTTī baḌī zarḳhez bahut hī soñdhī

gul-badāmāñ hai mire gang-o-jaman kī ḳhushbū

jab bhī guzrā huuñ sar-e-shām kisī marghaT se

duur tak aatī rahī apne kafan kī ḳhushbū

kaun guzrā hai yahāñ se ki mo.attar hai havā

jānī-pahchānī sī lagtī hai pavan kī ḳhushbū

tū ne jo zaḳhm diye bhar to ga.e haiñ phir bhī

umr-bhar aatī rahī us kī chubhan kī ḳhushbū

haiñ to zaḳhmī usī nāgin kī nigah ke 'ālam'

phir bhī chunte haiñ sadā us ke nayan kī ḳhushbū

jab bhi yaad aai mujhe us se milan ki KHushbu

mujh ko yaad aai bahut us ke badan ki KHushbu

gul ki KHushbu ho ki raihan ki bhini KHushbu

un ki KHushbu se moattar hai chaman ki KHushbu

garche pardes raha chaar dahai se pare

phir bhi din-raat satati hai watan ki KHushbu

haq ke shaidai sar-e-dar bhi haq bol gae

dur se aai unhen dar-o-rasan ki KHushbu

zikr allah ka jin lab se hua chaar pahar

un ki sanson mein basi mushk-e-KHutan ki KHushbu

qad to uncha hai mere yar ka us se bhi siwa

wo sarapa hai mera sarw-o-saman ki KHushbu

hai ye miTTi baDi zarKHez bahut hi sondhi

gul-badaman hai mere gang-o-jaman ki KHushbu

jab bhi guzra hun sar-e-sham kisi marghaT se

dur tak aati rahi apne kafan ki KHushbu

kaun guzra hai yahan se ki moattar hai hawa

jaani-pahchani si lagti hai pawan ki KHushbu

tu ne jo zaKHm diye bhar to gae hain phir bhi

umr-bhar aati rahi us ki chubhan ki KHushbu

hain to zaKHmi usi nagin ki nigah ke 'alam'

phir bhi chunte hain sada us ke nayan ki KHushbu