جب دانت کھول کر لب ساحل وہ ہنس پڑے (ردیف .. ا)

جب دانت کھول کر لب ساحل وہ ہنس پڑے

دریا میں مارے شرم کے گوہر پلٹ گیا

ہم سمجھے بزم بادہ میں گردش نصیب کی

منہ تک ہمارے آ کے جو ساغر پلٹ گیا

اس جان جاں نے غیر کی جانب جو رخ کیا

سینہ میں دل مرا بھی برابر پلٹ گیا

کوچہ سے زلف یار کے محروم میں پھرا

ظلمات میں نصیب سکندر پلٹ گیا

دولت کدے میں وہ شہ خوباں نہ جب ملا

دے کر دعائیں اس کا قلندر پلٹ گیا

وہ بد نصیب ہوں مرے بہکانے کے لیے

مانند غول راہ میں رہبر پلٹ گیا

میں زہر عشق زلف سے شیداؔ بچوں گا کیا

مجھ کو یہ سانپ کاٹ کے یکسر پلٹ گیا