jab dasht-e-tamanna mein koi phul khila hai

jab dasht-e-tamannā meñ koī phuul khilā hai

shahr-e-dil-e-ḳhāmosh se ik shor uThā hai

āñkhoñ meñ khañDar hoñToñ pe ik bhūlā huā naam

chāhat meñ kisī kī ye ajab haal huā hai

phir yādoñ kī dahlīz pe jal uTThī haiñ sham.eñ

phir palkoñ pe bikhrā huā ik ḳhvāb sajā hai

har saañs ho talvār sī jaise rag-e-jāñ par

jiinā bhī yahāñ naam kisī mo.ajize kā hai

ḳhāmosh bahut der se hai bahr-e-havādis

tūfān tah-e-āb koī khaul rahā hai

tum chāho to ye āḳhirī sarmāya bhī le lo

ik dard kī daulat ke sivā paas hī kyā hai

'betāb' baras jaane do āñkhoñ kā ye sāvan

tinkoñ kā badan sho.aloñ kī bāhoñ meñ ghirā hai

jab dasht-e-tamanna mein koi phul khila hai

shahr-e-dil-e-KHamosh se ek shor uTha hai

aankhon mein khanDar honTon pe ek bhula hua nam

chahat mein kisi ki ye ajab haal hua hai

phir yaadon ki dahliz pe jal uTThi hain shamen

phir palkon pe bikhra hua ek KHwab saja hai

har sans ho talwar si jaise rag-e-jaan par

jina bhi yahan nam kisi moajize ka hai

KHamosh bahut der se hai bahr-e-hawadis

tufan tah-e-ab koi khaul raha hai

tum chaho to ye aaKHiri sarmaya bhi le lo

ek dard ki daulat ke siwa pas hi kya hai

'betab' baras jaane do aankhon ka ye sawan

tinkon ka badan shoalon ki bahon mein ghira hai