jab dhup khili KHud ko ajab rah mein paya

jab dhuup khilī ḳhud ko ajab raah meñ paayā

aage mirī parchhā.īñ thī pīchhe mirā saayā

yuuñ raat ga.e kis ko sadā dete haiñ aksar

vo kaun hamārā thā jo vāpas nahīñ aaya

jab āḳhirī mauqa' thā ki sāhil pe utarte

dariyā ne hameñ apnī taraf aise bulāyā

sab ḳhush haiñ to lagtā hai ḳhushī 'aam sī shai hai

achchhā huā tū ne mujhe ġham-ḳhvār banāyā

pahle to samajh meñ bhī nahīñ aaya ki kyā hai

jab us ko batāyā to mujhe us ne batāyā

har dard kī ik had hai aur is had se ziyāda

ye kyā hai jise sah nahīñ paatā huuñ ḳhudāyā

vo ḳhvāb ke andar kā añdherā thā so us ne

sone na diyā mujh ko har ik raat jagāyā

jab dhup khili KHud ko ajab rah mein paya

aage meri parchhain thi pichhe mera saya

yun raat gae kis ko sada dete hain aksar

wo kaun hamara tha jo wapas nahin aaya

jab aaKHiri mauqa' tha ki sahil pe utarte

dariya ne hamein apni taraf aise bulaya

sab KHush hain to lagta hai KHushi 'am si shai hai

achchha hua tu ne mujhe gham-KHwar banaya

pahle to samajh mein bhi nahin aaya ki kya hai

jab us ko bataya to mujhe us ne bataya

har dard ki ek had hai aur is had se ziyaada

ye kya hai jise sah nahin pata hun KHudaya

wo KHwab ke andar ka andhera tha so us ne

sone na diya mujh ko har ek raat jagaya