جب دھوپ نے بدن کو سنایا کہ میں بھی ہوں

جب دھوپ نے بدن کو سنایا کہ میں بھی ہوں

سائے نے باہر آ کے بتایا کہ میں بھی ہوں

پوچھا کسی نے دل کا ستایا ہے اور کون

میں نے بھی اپنا ہاتھ اٹھایا کہ میں بھی ہوں

سوچا کوئی نہیں مرا بھگوان کے سوا

پھر ایک دن سمجھ میں یہ آیا کہ میں بھی ہوں

آنکھوں میں اس کی دور سے دنیا دکھائی دی

اس نے قریب آ کے دکھایا کہ میں بھی ہوں

ہر کوئی اس جہاں میں انا کا مریض ہے

ہر کوئی جب کہا تو یہ پایا کہ میں بھی ہوں

ہر بار آدمی نے کیا میں ہی ہوں کا شور

ہر بار وقت نے یہ سکھایا کہ میں بھی ہوں